老公山長水遠買蛋糕慶母親節　楊思琦勁冧豬

藝人楊思琦到電台接受薛家燕訪問，她笑指因疫情女兒留在家中多時，故要求一起前來。思琦透露最近在家中忙於湊仔「豬豬」，雖然忙但兒子無論瞓覺、去廁所、沖涼的表情也相當得意。工作則暫時因疫情叫停，要待疫情過去才復工。

思琦透露女兒相當愛錫弟弟，在家不時在他耳邊唱歌，亦有幫忙照顧弟弟。講到母親節怎樣慶祝？思琦表示：「都係喺屋企簡單食蛋糕慶祝，老公行咗好遠買咗個朱古力蛋糕畀我食，自己本來好怕甜，但係個朱古力蛋糕又唔甜，仲好鬆化，好好味。（老公湊仔有冇雞手鴨腳？）佢有幫手，依家學習緊。（個仔似你定老公？）兩個都似，耳仔同額頭好大就似我，個仔都易湊，好鍾意食嘢，食飽就會推開奶樽要求掃風。」