出完敏感Post冇被雪藏 蔡思貝以後會小心

2020年05月15日 17:30
東網電視
更多新聞短片
蔡思貝話以後出Post會小心。
藝人蔡思貝今日到電台受訪,見她悉心打扮、心情又靚靚,十足戀愛中的模樣,問到訪問後是否有約會?思貝笑指:「係難得出關,之前拍《踩過界II》醜咗5個月,醜到心理唔平衡,拍完就想扮吓靚,轉頭可能會去影吓相。(男友視角?)係助手視角,哈哈!要好好咁經營社交平台,平時都少Post嘢,見大家喺疫情期間都好落力,轉晒做KOL咁。」
講到早前被指出敏感Post,思貝表示:「之前已經同大眾講解過,唔需要再解釋。(工作有影響?)依家我都坐喺度做訪問。(之後出Post小心啲?)係囉。」
想學陶瓷同非洲鼓
思貝謂趁現時放大假,會的起心肝做一直恨做的事:「想去學整陶瓷。(人鬼情未了咁整呀?要搵個男伴喎!)唔一定要互動嘅,可以係一個人困喺個創作世界入面爆發,同陶瓷爆就得!另外仲想學打鼓,因為細個學過非洲鼓,好鍾意個節奏感。」又自認做宅女煲劇,問到有追睇緋聞男友胡鴻鈞主演的《降魔的2.0》?她說有支持:「覺得心姐(謝雪心)做得好感人。(咁胡鴻鈞呢?鄧佩儀話同佢有激情戲,你會睇?)冇所謂,我都有好多,每個演員都有角色需要。」隨即扯開話題指同時還有收看《十八年後的終極告白》:「知道秀惠(楊秀惠)畀咗好多心機去學手語。(佢賠錢提早離巢。)冇同佢傾呢啲,淨係祝福佢個小朋友健康。(之前佢又畀人貼大字報。)呢樣就唔太清楚。」