《十八年後》演技獲讚　楊秀惠畀監製一句點醒

《十八年後的終極告白》尋晚就啱啱播完，喺劇入面飾演聾啞人士嘅楊秀惠，其中一幕講到佢要阻止偷偷自己走嘅陳山聰，既要做表情又要流眼淚，仲要顧住情緒同埋做手語，真係少啲功夫都搞唔掂，出嚟嘅效果非常之好，好多網民都喺楊秀惠社交網留言大讚佢演得好！佢發文自爆當年演技差到爆，係一位監製講咗一句說話點醒佢，先至有今日嘅成績！

楊秀惠發文：「還記得剛入行時，演技非常差，以為將對白一字不漏的說完就叫做演戲。直到有天一位監製告訴我：『秀惠，你知道嗎，無論你演得好還是差，你演的每一場戲，將會成為永遠。』自此之後，只要每次一接到一個角色，我都會很用心，把每一場戲當成人生中最後一場戲那樣用心的演。感謝當時告訴我這句話的監製。讓我學會珍惜每一次的演出機會。」

啱啱做咗媽咪嘅楊秀惠其實已經離開效力咗16年嘅無綫，依家喺馬來西亞坐月，之後會以照顧家庭同生意為主，會唔會返香港再拍劇就真係未知之數。