吳業坤向JW宣戰打友誼波　估吓邊個贏！

相信王灝兒（JW）最近拎起球拍多過枝咪，直頭係迷上打乒乓球，日練夜練操到勁弗、勁Pro，就連手指公都開始起繭！每當學完新一招，佢都會將英姿Post上社交平台開心Share，隨即引嚟老友鬼鬼嘅吳業坤發表「挑機宣言」，大膽留言話：「單挑6分4！」勢要決一高下，冇驚過嘅JW就以勝利者口脗反問：「輸咗點？」坤坤勁大口氣答：「輸咗請食壽司！」不過就Feel到佢後尾有啲縮沙，要求三盤兩勝，仲要拍片為證，JW就梗係話冇問題啦，成班Fans都好期待佢哋呢鋪純「友誼波」！

至於JW嘅家姐Cindy都有留言，大讚妹妹呢個Ready Pose既Perfect又有力，再笑話：「如果有人得罪我，我派你去兜巴星佢！」另外，仲有Fans推薦JW入港隊，搞到JW哭笑不得！