有機會簽星夢　陳展鵬終身賣身畀無綫

無綫視帝陳展鵬在將軍澳電視城為新劇《超能使者》拜神，講到他有意簽唱片公司圓歌手夢？他說：「有兩間唱片公司傾緊，交咗畀公司經理人去處理。當年出道嘅時候係想做歌手，有錄過歌但係冇出碟就同唱片公司解約。（遺憾？）唔止遺憾，直情係失望，好開心近年公司畀咗好多機會唱主題曲，令我重拾信心，希望自己有新突破。（唱片公司重金禮聘？）呢啲就要問經理人。（簽唱片公司條件同TVB續約？）唔會，同TVB嘅約仲有一段時間，同公司關係良好，我簽到退休㗎喇，好似修哥（胡楓）咁幾好。（會唔會簽星夢？）都有機會，最緊要大家方向適合。」

展鵬表示為新劇開工兩星期，慶幸疫情期間多見女兒，希望女兒不要忘記他，他笑：「好開心個女依家能夠穩定咁叫爸爸、媽媽，唔會亂咗性別。」