黃宗澤被詐型 累汪明荃冇得做殭屍奶奶

2020年05月19日 21:13
東網電視
更多新聞短片
汪明荃做重量級嘉賓。
邵氏特別節目《飛虎同學會》第2集於myTV SUPER播映,面對「阿姐」汪明荃,個個都變得十分聽話,連嘉樂也笑平日一定搶韁的吳卓羲,很少如此乖巧。
汪明荃坦言最錫黃宗澤(Bosco),因他們與胡杏兒拍了兩輯《野蠻奶奶》,Bosco最初派口罩套,阿姐卻打蛇隨棍上取笑他:「以為你派請帖呀!快啲啦!嗰陣梁家樹話開一套黑色殭屍喜劇,都係你啦!搞垮咗個配搭!我仲以為可以做殭屍奶奶呀!」被阿姐「詐型」,Bosco無言以對,嚇到一額汗。
阿姐又問吳卓羲有沒有女朋友,他說:「我等待緣分嘅降臨。」嘉樂即插嘴笑他多虛假,可是甫出此言即引火埋身,阿姐指住嘉樂說:「喂!你老婆(湯盈盈)都等咗你好耐啦!」嘉樂即甩鍋給吳卓羲:「但唔似卓羲咁舔舔脷!佢食完嘢抹嘴呀!」吳卓羲即反擊:「你食完嘢唔抹嘴㗎?」二人舌劍唇槍之際,阿姐即替吳卓羲解圍:「要有緣分係啱嘅,撞得啱就係一個Right Timing,我同羅家英都21年先結婚!」卓羲卻說:「佢長期交往!長期試嘢!」阿姐即叫他解釋一下,弄得他不知如何收科。
讚山聰成熟可靠
於劇中演社團角色的陳山聰,被阿姐大讚成熟、可靠,山聰說:「因為一件事(與何超雲拍拖)曾經有段時間好迷失,最後靠自己走出困局,一步一步到依家,太太一直扶持我。」說到老婆喜歡他甚麼時,山聰引述太太Apple的說話:「你以前嘅嘢唔關我事,你嘅過去完全同我無關係。」令他相當感動。