貼地唔住5星級酒店　余思霆公開女神最真實一面

因為疫情關係，唔少藝人嘅幕前工作量大減，紛紛諗計轉型，好似踩過界做網紅拍片嘅有張繼聰、楊丞琳等，而近日前華姐冠軍余思霆亦加入網紅行列，開設個人頻道「思家霆園」，務求喺「疫」境下突圍而出！

為打響頭炮，余思霆拎出佢嘅殺手鐧，就係潛水啦！原來向來擅長潛水嘅佢，早前專誠去到墾丁上堂，學習唔使用氧氣筒嘅自由潛水，對佢嚟講絕對係一大挑戰！當中佢更記錄低喺酒店房嘅「閨房樂」，仲話潛水唔使住5星級酒店，因為唔會留喺房太耐，乾淨、瞓得着同簡單就得，相當貼地！佢仲大方畀大家睇吓女神私下最真實嘅一面，咁有誠意當然獲得一班網民力撐，仲話好期待佢再出片！