爆離婚後首露面！阿嬌打格受訪：不要迷失自我

「阿嬌」鍾欣潼自5月初爆出與台籍老公賴弘國婚變後，一直未有露面，而且未有頻密更新社交網。相反回復單身嘅賴弘國不時上載新相，又同網民「互動」及公開受訪。不過，閉關多日嘅阿嬌尋日突然蒲頭，係公開離婚後首次露面！

阿嬌喺社交平台更新動態，上載一段「受訪」片段，片段中嘅阿嬌戴上口罩，對眼打咗格，化身不願意透露姓名嘅鍾小姐，模擬被記者訪問！

記：你係幾時發現自己靚㗎？

嬌：去廣東打工嘅時候囉！

記：點解呀？

嬌：佢哋個個都叫我做靚女，我就迷失咗自我咯！

最後佢就垂低頭露出雙眼，片段並配文：「祝大家不要迷失自我，520快樂呀！」唔通係有弦外之音？好多網民睇完都話阿嬌充滿喜劇細胞，又讚佢本身就係個靚女，亦有人突破盲點話：「不願意透露姓名的『鍾』小姐！」即係點呢？