有Feel乜都得!黎紀君橫越地球送上門

2020年05月23日 10:08
東網電視
更多新聞短片
黎紀君讀書嗰陣讀女校,好少機會接觸異性。
歌手周柏豪、連詩雅的師妹黎紀君(Christy)當年讀女校,甚少接觸異性,直至在一次聯校合唱團活動上,終於接觸男仔,才開始拍拖,她自爆初戀發生於中三:「我哋喺聯校活動識嘅,真係好純真,仲好記得佢覆我訊息覆得好快,呢樣我好鍾意,覺得呢個男仔幾好吖,咁就一齊咗好簡單。其實當時我都唔知咩叫拍拖,覺得睇吓戲、唱吓K已經係。」
最怕悶男
Christy相信一見鍾情,試過最短一次認識男仔只得5日便一齊,她說:「我好少日久生情,鍾意一個人,7日就知㗎喇,如果冇Feel,一個月都唔會有Feel。」其擇偶首要條件是性格相近,因男友會是她每日傾訴對象,若性格不合很難相處。自嘲有過度活躍症的她笑言:「我唔係好坐得定,所以唔會揀個太悶嘅男仔,我鍾意男仔有幽默感,起碼講到笑,氹吓我開心。(外形呢?)冇人唔鍾意高大靚仔,我都鍾意。」
她承認以前小時候戀愛大過大,讀大學時曾有一段遠距離的感情,為了對方,她頻頻飛到外地:「我係完全唔理三七廿一就飛,嗰時讀書簽咗經理人做Model,有一、兩日假都會飛過去,好誇張㗎!但依家真係唔會,等對方飛過嚟囉。」
踢拖行禮
目前單身的她坦言未有拍拖念頭:「我覺得拍拖係一件好需要花時間嘅事,依家我最缺少就係時間,因為要打理蛋糕店,又想多啲幕前機會,所以想做好工作先。」小時候,她想過30歲必定結婚,如今會順其自然。有顆少女心的她一直不喜歡傳統婚禮,亦不愛穿高跟鞋,憧憬將來着拖鞋在泰國沙灘行禮:「我會好興奮囉!」
Profile
年齡:26歲
身高:1米68
嗜好:打機、整翻糖蛋糕