生日扮冇事發生!吳若希認有新成員加入:小男孩

2020年05月23日 12:33
東網電視
更多新聞短片
Alex又再中多槍…
不時喺社交網公數鬧老公何兆鴻(Alex)不是嘅吳若希(Jinny),尋日又「嚟料」隔空開火,不過床頭打交床尾和,今日28歲生日嘅佢瞓醒覺好似當冇事發生咁,上載同Alex及細佬合照晒幸福,留言話:「昨晚過得好滿足~謝謝大家提醒我第四年過25歲生日,終於25歲啦,希望30歲不要那麼快來到,同埋食極唔肥!!! 蛋糕上的是真花😍」唔知佢句「昨晚過得好滿足」係咩意思呢?不過識講笑話自己25歲生日,睇嚟心情相當唔錯啦!
Jinny獲唔少生日祝福,但難為Alex尋晚被佢暗寸後,再被網民「踩場」寸老,有人問Jinny:「你其實幾多歲嘅?不過你老公個樣需要執吓,個樣好殘,同你影相真係好似uncle咁😅」雖然老公被話,但Jinny就大方神回:「唔錯呀~我以後會稱呼佢Uncle😌」
而一直未肯承認大肚嘅佢,本來話遲啲講畀大家知,今日佢終於透露有新成員加入:「趁著(着)今天生日,想公佈(布)兩個好消息,第一件事是,家裡(裏)添了一位新成員,小男孩,已經兩個多月大了,從街市領養回來的,他叫Kristoff,我女兒改的😊第二件事是,6.16是個大日子,我的專輯要面市了~ 籌備了⋯ Um⋯ 大概⋯⋯ 4年?好啦~ 無所謂了啦😌最重要的是,終於出了~最後祝我生日快樂💙」咁幾時先認佗B呢?