伍家謙請重量級陪月湊龍鳳胎　網民嗌擔心

前TVB體育主播伍家謙4月時喜迎龍鳳胎，早前仔女滿月時，佢就直言「攰就必然嘅」，每日瞓得3、4個鐘，仲要拆開6次嚟瞓，不過過咗1個月，已經開始慣！咁辛苦冇陪月幫手咩？有！仲要係星級陪月員添！

伍家謙喺社交網話：「新陪月今日返工喇，手勢幾好，做嘢又有交帶?」呢位陪月真係唔講得笑，佢係香港拳王「神奇小子」曹星如呀！咁有分量網民都笑言一定好重皮，仲好擔心伍家謙：「唔好得罪個陪月，我怕你鼻都扁埋??」

而伍家謙透露仔女改咗英文名：「怪獸仔叫Archibald，有勇氣同真誠嘅意思，我哋通常叫佢做Archie，而怪獸女就叫Audrey；至於中文名，就仲等緊過風水師傅嗰關。」