心臟病發死過翻生　林盛斌乖乖食藥防復發

藝人林盛斌（Bob）年前患上心臟病，近日以過來人身份拍片談當時心路歷程，當年他知道3條血管均有阻塞仍堅持開工，幸得醫生及時阻止，急急接受手術才逃過一劫，而家中3個囡囡聽見爸爸入院即非常擔心，「大家姐」提醒兩位妹妹不要打擾爸爸休息，令Bob窩心非常。經此一役，阿Bob洗心革面，積極投入推廣心臟健康。

Bob憶述：「我記得當時心嗡住嗡住，好似畀重嘢壓住咁，呼吸有啲困難，膊頭、背脊甚至牙骹都痹到痛！」由於情況緊急，須即晚入院「通波仔」，太太惟有保持鎮定，幫他收拾行裝，反而是自己手術前胡思亂想：「驚自己有事，驚3個細路（當時細仔未出世）冇人照顧，驚有乜事老婆一個人搞唔搞得掂⋯⋯」

幸而，手術最終順利完成，Bob表示手術後曾經對太太發誓，要努力保護心臟，亦聽從醫生建議，服用雙抗血小板藥物預防復發，他打趣說：「我成世都未試過咁聽話，醫生話食幾耐就食幾耐，開工、出埠都唔會唔記得帶藥。」