黃日華喪妻後首現身 黃芷晴心痛落淚

2020年05月28日 14:20
東網電視
更多新聞短片
黃芷晴心痛落淚,場面令人心酸。
藝人黃日華太太梁潔華日前病逝,終年59歲。飽受喪妻之痛的黃日華,今日下午一時十五分駕駛私人座駕離開大埔寓所,車上還有女兒黃芷晴及兩名友人。約半小時後,一行人抵達紅磡世界殯儀館,戴上眼鏡及口罩的黃日華雖然眼腫腫,但精神尚可,相反黃芷晴心情沉重,全程低頭,訪問期間提到母親遺願及遺憾時更飲泣,場面令人心酸。
黃芷晴家中見飛蛾
黃日華與女兒黃芷晴落車後,接受傳媒訪問。黃日華表示多謝大家有心,問到芷晴昨晚在社交平台抒發感想後心情可有好些?她表示:「好好多,因為多年冇講到。(有冇發夢見到媽咪?)暫時未,不過尋日喺廳見到有隻飛蛾聽我哋講嘢唔走,陪住我哋。」黃日華指這幾天都有女兒芷晴陪伴在側:「大家呢段時間互相扶持、照顧,我哋OK,大家放心。」問到太太的遺願?他表示:「太太叫我哋照顧啲小動物,睇住個女,同睇住佢阿媽。(呢段時間會唔會停工?)不嬲都停工,加上疫情,要做應該做嘅嘢先,就係太太嘅後事,復工暫時未有詳細打算。」問到太太可有講過怎樣處理身後事?他表示:「佢立咗遺囑,佢有叫我幾時拎出嚟睇,但暫時未有時間。」
黃日華讚太太堅強
講到芷晴想來生媽媽做其女兒,她表示:「係呀,因為爸爸話媽咪一生辛苦照顧我,為咗我放棄自己事業,所以希望體會佢嘅角色。」問到黃日華現時心情如何?他謂:「OK,因為唔係突然發生,有幾年時間畀我哋慢慢適應,個女都知道呢一日始終來臨,我哋都用咗3年時間適應,可以堅強面對。(覺得太太好叻?)係呀,事業、家庭、動物都照顧好,做人都好堅強,永不放棄,從來冇向困難屈服,呢幾年佢辛苦大家都心痛,但佢冇放棄過,堅持到底,想打贏呢場仗,所以都帶出訊息,唔好放棄生命,生命好重要。(太太最後嗰個時候有冇好辛苦?)冇,最痛已經過咗,彌留嗰陣因為器官衰竭,見到佢舒服,同佢講嘢都有笑容,係笑住走。」
擔心女兒未嫁人
問到太太的遺願及遺憾?芷晴忍不住飲泣,黃日華表示:「始終都係擔心個女未嫁人,同埋擔心佢阿媽,我叫佢放心,芷晴大個女,識照顧我,唔使我照顧佢,佢阿媽我都會一切照顧。(經濟有冇問題?)冇問題,同女一齊住。」黃日華之後又搭住芷晴膊頭說:「希望你睇住我。」芷晴又透露已挑選了媽媽的遺照:「上年母親節媽媽打扮同我食飯,其實呢幾年佢唔肯影相,我電話得4、5張合照,上年母親節佢戴住粒石影相,上面有健康兩個字,所以揀嗰張相,希望佢可以帶住健康咁離開。」而壽衣就未選,留待開會再決定,儀式會以香港創價學會佛教儀式舉行葬禮,遺體將會火化。另外,黃日華在殯儀館期間,其座駕被抄牌。
梁潔華6.13設靈 
黃日華、黃芷晴父女於殯儀館逗留約三個半小時後離開,黃日華指已定好喪禮日期6月13日設靈,14日出殯,靈堂布置清雅為主,會放粵劇戲服作陪葬品。而安葬地點就未定,問到喪禮會否因疫情而控制人數?黃日華說:「會通知晒所有親朋戚友,太太手機都有好多人問幾時搞喪禮,想出席喪禮見最後一面,明白因為疫情好多嘢都控制唔到,大家都有心。」之後,黃日華一行四人便登上座駕返回寓所。