2.48億身價照慳家！王俊凱打包4飛機餐慳到盡

內地組合TFBOYS成員王俊凱紅遍大陸，一舉一動都成為網民焦點，日前現身北京機場時，被眼利網民發現身邊嘅助手拎住四盒飛機餐飯盒落機，慳家到連飛機餐都打包，引起熱話！有指飯盒裏面裝住嘅係麵包，王俊凱怕工作時肚餓，留來以備不時之需，加上唔想浪費食物，此舉令網民大讚。

王俊凱出生小康之家，爸爸係屋企經濟支柱，所以從小就好慳家，佢曾於節目中自爆11歲入行時，抱住「不用花錢訓練，公司還返錢」嘅心態開始練習生涯，到出道後經濟一直由父母管理，佢仲透露過自己一個星期得200蚊零用錢，大部分用於食飯，甚少購物。有粉絲更爆料指王俊凱連70蚊剪頭髮都嫌貴，寧願返屋企畀阿媽操刀，慳家到世界盡頭！

節儉係美德，加上王俊凱人氣高企吸金力強，17歲時已係內地90後十大富豪之一，身價有2.48億，買過最貴嘅嘢竟然係一部價值一萬蚊嘅電腦，呢位小鮮肉有樣有才華有內涵，絕對係圈中筍盤！