四姊妹進軍幕前?譚凱琪家姐原來係「陽光妹」

2020年06月04日 18:43
東網電視
更多新聞短片
傳聞譚凱琪有四姊妹都做過幕前,不過唔係真㗎!
圈中一向都有唔少索爆姊妹花突圍而出,就好似湯洛雯同妹妹湯樂瑤,余香凝同妹妹余潔滢等,都成功俘虜一眾宅男!但係唔講都可能唔記得,最近喺熱播劇《降魔的2.0》同《飛虎之雷霆極戰》都有份演出嘅譚凱琪,佢家姐譚凱欣都有做過幕前㗎!
譚凱欣喺1991年做「陽光妹」入行,拍完廣告之後,佢憑住甜到爆嘅樣子,好快就受人注目,之後轉戰影壇,拍過《新殭屍先生》、《飛虎雄心》等電影,到咗2005年,佢同前組合風火海成員朱永棠(《古惑仔》「巢皮」)結婚,婚後生咗兩個女,淡出幕前。到咗近年佢活躍喺社交網,不時晒近照,睇到佢身材同個樣依然Keep到,完全唔似係人哋媽咪添!
最近網上盛傳譚凱琪原來係有「四姊妹」,仲話四姊妹都曾經進軍幕前,分別係大家姐譚凱欣、二家姐譚凱韻同埋細妹譚凱倫、但係譚凱琪好快就出嚟澄清話,佢只係得一個家姐譚凱欣,其他嗰兩個都同佢冇血緣關係㗎,大家唔好誤會啦!
其實睇番傳聞係二家姐嘅譚凱韻曾經做過電視台新聞台主播,個樣夠晒斯文,喺網上都有唔少粉絲,但係睇落就同譚凱琪唔係好似樣囉!而傳聞係細妹嘅譚凱倫係「ViuTV女神」,有唔少紋身嘅佢,身材火辣,不時喺社交網晒性感相派福利,佢仲曾被指暗撻夏雨兒子黃奕晨,捲入「小三」疑雲。