【負面當宣傳】林家謙踩Serrini新歌勁難聽

「叱咤樂壇生力軍」金獎得主林家謙與Serrini舉行網上音樂會，他們會互唱對方歌曲，Serrini表示：「我呢啲獨立歌手會唱比較商業、好似好成功、值得尊敬創作人嘅歌，佢就唱我啲比較無聊嘅歌。」問到平時兩人都可是不停鬥嘴？Serrini謂：「我哋唔識架，哈哈。」林家謙就謂：「我哋相處係咁，唔可以認真。」Serrini即表示兩人沒有相處過，家謙反擊：「係囉，其實我連佢電話都冇save。」Serrini繼續鬥嘴：「佢喺我社交平台留言話我新歌好難聽，用負面方法做打手，愈鬧我即係愈愛我，哈哈。」她又笑言可以寫首歌暴露對方的黑暗面：「佢個人扮晒正經。」

而講到林家謙的新碟賣晒，他表示反應比想像中好，但不打算加印：「驚加多一批賣唔晒會變咗蟹貨，要減價到40幾蚊一隻就唔好，寧願珍貴啲。（反應好更有信心？）係呀，依家出實體碟好博，諗咗好耐先出，依家賣晒都真係老懷安慰。」Serrini則笑言原本對方話會送隻碟給自己：「點知最後冇送，可能佢寫咗啲深情說話擺喺床頭櫃。」