藝人范振鋒、李思欣和蘇慧恩下午到尖沙咀出席慈善活動。阿范夫婦自疫情開始就工作量大減，至最近開始再有客戶接觸，思欣表示：「起碼多咗人傾嘢問價，有單11月司儀工作落實咗，但未知會唔會延期。」她又指自己最近忙網上拍片「搵出路」：「連製作同剪片都學埋。」

阿范則透露自己加入娛樂公司會開拍賀歲片，落實由佘詩曼出任女主角，預算8月開鏡：「但依家未知情況會點，如果最終搞到10月先開，又驚趕唔切後期製作。」問二人多了時間相處，會否積極造人，阿范即謂：「多咗時間自己好好做人就真。我都仲有電台工作，但返工要注意打扮，事關多咗直播同網上買嘢，好多時要出埋鏡，同我以前返電台好唔同，所有嘢都喺度轉型。」他又計劃待疫情過後，兩夫婦出埠拍旅遊節目。

另外，蘇慧恩則自爆早前跣低弄傷腰骨：「依家要暫停跳舞，起碼要休息個多月，之後就要積極投入10月尾嘅演唱會綵排。未受傷前已練到一字碼，依家中斷咗做運動，相信遲啲一切要再嚟過！」