【靚仔有才華】涂毓麟齋飲果汁減肥瘦4公斤

環球歌手涂毓麟（Oscar）推出新歌《日出彩虹》，透露編曲上有少少已故歌手陳百強的影子：「前奏同《畫出彩虹》有啲相似，攞咗佢個巧妙之處，首歌有啲80年代嘅感覺，我哋覺得好似好耐冇一首正面嘅歌，所以就出現咗呢首歌。」講到他與陳百強都是官仔骨骨，又有創作才華，他笑言不覺得似對方，自己比較偏向行鋼琴、作歌路線。

提到新歌鼓勵大家只要咬緊牙關，就可以走出困境，問到平時遇到困難怎樣解決？他坦言：「唔會繼續啄住嗰個位，會move on去第二啲嘢，都會聽歌或彈一、兩個鐘琴放鬆個人再返去件事度。（困難時期特別有靈感寫歌？）唔會喺嗰下，但會記住個感覺，真係寫歌時就會寫番嗰個感覺出嚟，我都有啲demo係喺呢個情況下寫出嚟。」

他亦坦言對自己要求高，如果迫切性的話更會逼自己做到某件事：「好似拍呢首歌MV前我覺得自己有少少肥，所以逼自己即刻減肥，試咗個幾極端嘅方法，就係齋飲果汁幾日，一日三餐全部果汁，維持咗5日，瘦咗起碼3、4kg，因為我仲有繼續做運動，不過依家冇再咁做啦。」