林秀怡開美容院杜絕層壓式推銷：唔Sell人！

藝人林秀怡（Kirby）繼三年前膽粗粗跟朋友合資開日式西餐廳後，今日她於社交平台留言指正籌備一間店舖，宣布再做老闆娘！Kirby接受訪問時，興奮透露七月於銅鑼灣開設美容院，望杜絕層壓式推銷︰「因為我好唔鍾意坊間美容院嗰種狂Sell嘢嘅手法，去親做美容都提心吊膽，所以我想開一間一定唔會Sell人嘅美容院，你做咗一次覺得好就自然會買。（會做埋生招牌？）會影輯靚相。」

問到是否西餐廳有賺而有「彈藥」再做生意？Kirby表示今次同樣跟朋友拍住上︰「同兩位朋友，每人投資6位數字，啲資金純粹係自己投資番嚟，再儲吓錢。餐廳方面暫時未有盈利，加上疫情之下生意額都跌咗一半，禁聚令都冇咗一半枱，不過唔使蝕就已經好好。」續坦言逆市開舖有一定壓力，但相信疫情會好快過，到時就會一切回復正常︰「就算唔係疫情，本身開美容院嘅首要條件係要乾淨，依家會再加強消毒工作。（會成日落美容院打躉？）落餐廳多啲，不過可能會成日上去做Facial，哈哈﹗」