冇同黃心穎聯絡！許志安復工：呢個係錯誤嘅傷痕

藝人許志安被爆背妻偷食黃心穎，事件成為全城熱話，之後他開記者會認錯，更自嘲「我係一個壞咗嘅人」，同時開始全面停工。「安心事件」後潛水14個月，今日許志安正式復工，為ViuTV節目錄影，見許志安精神不錯，手上戴有婚戒。

他表示：「經過呢段時間沉澱靜思反省學習，覺得自己成長咗好多，呢段時間係有困難嘅，而當我每次問自己起點係邊嘅時候，我都會好盡力咁向前望，今日覺得呢個係好好嘅時間出番嚟面對自己、社會同群眾，呢件事嘅發生令我喺未來日子，會行得更多，要重新出發，做好自己。呢段時間入面，我用咗好多時間陪屋企人，因為覺得屋企係最重要，同埋好好裝備自己，陪多啲屋企人，睇書做運動、鍛煉好自己，深深咁樣去諗下自己未來日子應該點行，今日係時候出嚟見大家，承擔番自己講過嘅嘢，畀自己年幾時間靜思己過，重新出發。」

問到是否全面復出？安仔謂：「自己唔敢講，疫情之下，好多嘢都唔到我去講同諗，我今日出嚟係想話畀大家知，我準備好，我都未知未來係點，但我一定100%比以前好，復工嘅嘢交畀公司。」

事隔14個月再跟傳媒見面，問到有否緊張到瞓唔到？許志安謂：「都有，我同自己講係咪Ready？太太都有同我講，出嚟工作要100%心態Ready好，內心要正面，出嚟要真心，其實我呢年幾，我都有問自己係咪可以呢？出嚟見大家都有少少緊張，不過我就算緊張都要面對將來。」安仔提到太太時都不禁有點眼濕濕，記者再問到太太有沒有鼓勵他？他謂：「冇特別，叫我自然啲，同埋對自己有信心，呢段時間都有好好修理自己，屋企隻狗Lucky隻腳行唔到，我喺佢身上都學到好多嘢，學到珍惜，但亦花咗好多氣力照顧佢，但都值得嘅，佢陪咗我哋咁耐，依家幾個人一齊湊佢，希望佢可以喺倒數嘅日子裏面開心啲。」

至於有沒有聯絡黃心穎？他謂：「冇，以前嘅嘢已經過咗，希望大家畀時間我，明白一時間未能接受，但我會每一步都做得好好，過去由得過去，呢個係錯誤嘅傷痕，係唔會忘記，每次睇到都會警醒自己、要做好自己！」

對於馬國明有新戀情，安仔表示：「我都有睇報道，佢嘅感情由佢自己講番。（今次復工，最想多謝邊個？）好多人需要多謝，屋企人、太太、朋友畀咗好多鼓勵同支持，仲有好多嘢係心入面，之前Joey Tang（鄧建明）演唱會有叫出嚟，但我未ready好，所以婉拒咗，面對自己係需要有信心。（咁你會唔會開番之前開唔到嘅個唱？）完全未有打算，今次出係想畀一啲信心支持我嘅朋友，我可以向前行，其他順其自然。（會唔會做梁漢文演唱會嘉賓？）未被邀請，但開心事，有時間都會去支持。」

未來有甚麼新工作？許志安表示：「之前有工作但我未ready，未知下一個工作係乜嘢，之前都有同蘇永康去派口罩同埋探訪老人家，同老人家傾偈可以思考人生，希望可以多啲關心社會。（挽回事業？）盡力，假以時日，希望大家會見到。」