佗第二胎勁辛苦 吳若希仲想生多個!

2020年06月16日 14:03
東網電視
更多新聞短片
諗諗先啦!
歌手吳若希(Jinny)宣布懷有第二胎後首度現身,腳踏平底鞋的她今日接受電台節目訪問宣傳新碟《愛情無價》,她透露已懷孕14周,初期妊娠反應大,非常痛苦:「之前好嚴重,由中午12點攬住個廁所到夜晚11點,依家就漸入佳境。」
已有一女的Jinny承認第二胎是仔,剛好湊成一個好字,但她否認刻意追仔:「我係想生女,但冇所謂,屋企人對性別冇乜要求,我哋又唔係有幾百億身家。(可以封肚?)唔會特別封,如果屋企環境許可又有條件,我會希望生三個,但養小朋友要好多資金同心力,如果我唔係移民或者身家暴漲,唔會再生第三個。老公就鍾意仔,因為可以陪佢踢波,佢係運動愛好者。(想你生隊足球隊?)咁叫佢出面搵人同佢做運動,搵朋友去踢波啦!」
講到因懷孕而推劇,Jinny表示因身體關係而沒辦法:「公司好體諒,咁都有少少嘢做,今胎係辛苦。覺得自己身體未必負擔到,唔可以連續幾日工作,可能今胎係仔,行五分鐘路已經好攰。依家主要宣傳新碟,做啲輕鬆同埋坐喺度嘅工作。(老公貼身照顧你?)都係,大肚個人係蠢咗,反應慢啲。(當你女王咁?)依家可以不停點佢做嘢,好難得有個時期畀我勞役佢,所以要用盡佢,佢要等我坐埋月先。我老公好搞笑,佢知道我有咗之後,第一個通知嘅人唔係父母,而係陪月。因為上胎個陪月好好,湊到個女好乖。(個陪月預約咗?)預約到,但有一個星期好似疊咗時間,陪月真係好重要,所以我之前睇劇集《BB來了》好有共鳴。(囡囡知唔知有個細佬?)知,佢好早就知,但佢話鍾意妹妹多啲,不過我哋成日灌輸佢要鍾意BB,所以佢本身好鍾意BB,但佢話佢啲衫同玩具唔會畀細佬玩,我話細佬冇玩具玩好慘,佢話咁畀少少佢玩啦!」