見彩虹如見靚湯！馬國明粉絲勁撐「明湯戀」

藝人馬國明日前被東網率先踢爆與湯洛雯（靚湯）拍拖，隨後二人喺社交網認愛，「明湯戀」獲全城睇好！最開心莫過於馬國明嘅粉絲，眼見偶像dry咗成年有多，如今終於抱得美人歸，梗係零舍興奮，仲同蕭正楠一樣「望住湯洛雯就諗起馬國明」！

不過今次調番轉，係望住馬國明諗起湯洛雯，尋日唔少人雨後見到彩虹，而馬國明亦係其中一位幸運兒，唔知係咪工作太忙，今日先有時間上載社交網，佢留言問：「大家看到甚麼……？」唔少網友紛紛留言「你同湯洛雯的未來」、「靚湯」、「我哋睇到幸福」，好難得兩邊粉絲都咁支持，睇嚟好事唔會離太遠～