羅嘉良孖大陸網紅Sell貨　網民唔Buy嘲自貶身價

已轉戰大陸發展多時嘅羅嘉良（撈家），近期密密喺大陸社交平台拍片，最近仲進攻埋直播界孖網紅Sell貨搵銀！喺直播前，佢就孖呢對網紅「廣東夫婦」一齊拍咗幾條片作宣傳之用，佢重現佢喺經典劇《難兄難弟》「奇哥」一角，但被網民批娘味濃而且浮誇！

到直播開始，唔知係咪第一次玩嘅關係，撈家唔係好識講嘢，有啲尷尬，但當粉絲要求佢唱歌時，佢就表現相當落力有求必應，一連獻唱幾首歌包括代表作《歲月的童話》，直播賣貨秒變演唱會！雖然鏡頭開晒濾鏡，但似乎都掩飾唔到撈家嘅疲態，雙眼浮腫，眼袋盡現。

有網民就唔係好Buy佢落場Sell貨，覺得貴為三屆視帝嘅佢竟然自貶身價，要同網紅開直播，而且只有兩萬人睇，交易額唔多理想，有人直言：「以前很喜歡你，你的電視劇都看過，但現在和網紅在一起，說實話很心疼，太掉你的價了！」不過都有網民覺得只係把握賺快錢嘅機會，何樂而不為呢？