【摘去《延禧》光環】傳吳謹言被打入冷宮

內地女星吳謹言憑宮鬥劇《延禧攻略》一炮而紅，光速登上一線花旦之列，但自《延》劇後，佢好似後勁不繼，人氣開始下滑。有傳因為佢同于正合約就快夠鐘，一心向外闖；不過另一說法係傳于正另有所「屬」，傳已棄「言」保「鹿」，改捧同公司另一美女新人白鹿，于正更鋪天蓋地喺社交網為白鹿宣傳，翻查資料，由于正製作嘅大陸劇《世界欠我一個初戀》、《烈火軍校》﹑《玉樓春》﹑《招搖》都有搵白鹿拍等，呢兩年內就有2部劇做女一，分薄吳謹言資源。

厚此薄彼，定係有口難言？于正似乎仲係幾緊張吳謹言，對於自己一手捧大嘅「囡囡」失寵，佢就喺社交網話全部都係無稽之談，更怒斥造謠者：「不要扯甚麼合約快到期，甚麼不受寵，你是我肚子裏的蛔蟲？我想啥都知道？我很愛我的藝人，也不輕易簽藝人，簽進來就拉進一個群當親人相處，不分彼此。」又話每個藝人佢都放喺心上，只係新人就需要多啲照顧：「要說真有偏心，也更多偏向新人，畢竟娛樂圈寒冬，明星有選擇，新人更難，當初他們還是新人的時候，我也如此！」