【26年前劇集又關馬國明事】未來外父同「追過」的曾華倩有路？

藝人馬國明與湯洛雯（靚湯）大方認愛拍拖兩個月，全城祝福「明湯戀」，二人仲去到已見雙方家長嘅階段，靚湯爸爸湯鎮宗對未來女婿讚不絕口，今次真係斟定茶都得喇！

原來馬國明亦同未來外父湯鎮宗好有淵源，湯鎮宗曾於劇集《前世冤家》與曾華倩有感情線，講述湯鎮宗前世今生都周旋曾華倩與李美鳳兩女之間，好有桃花緣！而曾華倩係馬國明入行後第一個緋聞女友，2005年被拍到咖啡店內親暱談心，女方更親自駕車載男方返屋企過夜，即傳出戀情。曾華倩比馬國明年長9歲，有傳曾華倩兒子極力反對呢段感情，令呢段姊弟戀無疾而終。

馬國明係圈中出名嘅鑽石筍盤，唔煙唔蒲已經少之又少，除咗開工以外時間都留嚟陪媽咪，係正宗乖乖仔。感情方面更係擔屎唔偷食，公開承認只有胡定欣、黃心穎同湯洛雯3段感情，專一唔花弗眾所周知，難怪馬國明同靚湯嘅粉絲都咁支持呢段戀情！