內斂湯鎮業父愛藏心底　孖仔入行始知爸爸辛苦

藝人湯鎮業的孖仔湯君慈（Bruce）與湯君耀（Chris）因父親正在內地拍戲，故父親節未能一齊慶祝，兩人表示﹕「到時可能會同爸爸視像傾偈，以往會同埋家姐一齊食飯，通常家姐會送禮物，我哋就好少送。」

講起童年回憶，孖仔指小時候兩兄弟倆經常打交，讀書成績又差，不時把爸爸氣壞﹕「我哋成日打機唔返學，一年有百幾日都係遲到，成績太差，所以畀爸爸打。」兩人坦言小時候爸爸經常在內地工作，大學時又在美國升學，故父子相處時間不多﹕「爸爸會盡量爭取機會同我哋相處，大學畢業時，佢睇我哋畢業禮，嚟咗美國一個月，大家日日一齊，感情好好。有時我哋去內地，爸爸就會叫我陪佢去品牌活動。」

兩人指父親比較內斂，不擅將愛宣之於口，但知道爸爸十分緊張及愛鍚他們，大孖Bruce舉例說﹕「我有次同爸爸喺北京拍戲，我哋現場好少傾偈，但佢不斷問我身邊人，我表現點，又叫其他人叫我小心啲。當時北京零下十幾度，佢知我帶唔夠衫，會上網訂衫畀我。」他又記得小時候把親戚家的雲石噴水池弄破，最後要由爸爸執手尾。至於細孖Chris在美國讀書時把車撞壞了，但不敢跟家人要錢修理，後來爸爸知道二話不說便匯錢給他，他們覺得爸爸是只做不說的人，從小事中可以感受到爸爸的愛。現時孖仔跟隨爸爸的步伐入行，兩人對父親有更多了解﹕「知道佢工作係好辛苦，以前以為拍戲好簡單，原來唔係，爸爸係好專業。依家同佢傾電影，發現佢識好多又睇好多電影。」

湯洛雯爆老竇無暇慶祝

另外，孖仔的堂姊湯洛雯坦言未落實父親節如何慶祝﹕「爸爸都唔得閒，大家都好忙。」問到身為上位花旦的她對堂弟在演藝路上的建議，她謙稱﹕「我都係新人，冇乜心得，都係專注啲、勤力啲。」