【嬲爆記一世】吳若希臨盆生得　老公唔理繼續瞓

歌手吳若希（Jinny）現身TVB娛樂新聞台節目《StarTalk》接受主播許文軒專訪，大談相隔4年推出唱片的感受及大爆老公Alex惡行，她表示：「隻碟就好似陪住我成長一樣，最早錄嗰首係《泣血薔薇》，錄時咁啱係我媽咪撞親入院，當時我把聲係爛晒；而《麻醉》呢首歌係講我老公拍拖時嘅關係，我本身好鍾意隻歌，但又愛又恨，大家聽吓就知我老公未同我結婚時有幾多大話，搞到依家我一聽到啲歌詞就好嬲，因為我最憎人講大話。」

問到為何時常公開談及老公的惡行時，Jinny笑言：「其實呢啲唔係情趣，係事實！因為用溫和嘅方法對男仔係冇用，不過有咗家庭嘅男人會變得成熟啲，佢依家唔同咗，但仲有好多進步空間。」其後Jinny忍不住再數落對方：「好記得上一胎我臨生，姑娘叫佢起身唔好瞓，話你太太生啦！佢竟然繼續瞓，嗰下真係嬲，呢個人點可能唔理小朋友出世，掛住瞓，我好期待今胎佢會唔會瞓到成隻豬咁。」