「外景捕獲」周潤發！鄺潔楹想買起件戲服

影帝周潤發相當貼地，不時於各區出現，而同佢集郵亦成為咗唔少市民甚至圈中後輩嘅目標！呢日「仙氣女神」鄺潔楹（Judy）就非常幸運，竟然喺拍攝無綫新劇《七公主》途中「野生捕獲」周潤發，佢當然有把握機會合照，更放上社交網，並留言：「原來見到發哥會心如鹿撞，搞到我連鏡頭都唔識望。希望服裝同事會比（畀）我買番呢件外套，因為發哥加持過。」即令好友江嘉敏大感羨慕，留言：「我又要同你出外景！」

有網友指難得拍劇時遇上周潤發，好希望佢都可以客串一下，亦有網友留意向來係「哈比人」嘅Judy，相中竟然同1米8嘅周潤發「平排」頭貼頭，笑指Judy係咪企高合照。