捧愛貓做女一　吳業坤挑戰莫文蔚洗腦歌

莫文蔚獻唱的《呼吸有害》因無綫劇集《飛虎之雷霆極戰》而成為洗腦歌，繼糖妹翻唱後，吳業坤（坤坤）同音樂人Cousin Fung都喺社交網推出「男男合唱版」。

喺片中坤坤抱住愛貓Rabu出鏡，又好肉緊咬貓，搞到Rabu「怕咗佢」多次跳出鏡，佢又扮瞌眼瞓，最後仲撻喺床上面瞓着咗。網民好奇，點解佢有呢個演繹呢？

坤坤接受東網訪問親自解開謎圑，佢話其實扮瞓覺係Cousin Fung嘅意思：「因為佢覺得夢景係最美好嘅，但瞓醒就一切好夢成空。」至於翻唱《呼》歌，佢就話有特別意思：「我喺《飛虎之雷霆極戰》入面死咗嘅，所以好多人都問我：『乜你未死咩？』我想講畀人知，其實我係未死嘅，但又唔想就咁甫張相咁單調，所以咪唱首歌囉！」

至於有人將坤坤同糖妹版本作比較，佢就覺得好難相題並論，因為男聲同女聲係好唔同嘅。亦有貓迷問Rabu幾時正式做佢MV女主角？坤坤回答實有機會，只係等Rabu再「大個女啲」，因為佢依家好活潑，成日跳嚟跳去，好唔穩定。