安采妮飛甩陳達仁後疑撻着人夫　驚爆五角關係

藝人安采妮與經理人兼DJ陳達仁早前鬧不和，有指陳達仁租屋予安采妮居住，兩人關係複雜，而陳達仁還認與太太搞緊離婚，安采妮早前拍片指受到嚴密監控，索性搬走避開陳達仁，據知安采妮搬走後入住香港犬隻訓練總會犬隻行為糾正顧問朱學文（朱Sir）的村屋底層，而朱Sir的太太懷疑老公出軌，在社文網貼圖示意將一堆衣物掟出街，再配以「大掃除，真開心 #賤人狗男女姦夫淫婦老淫蟲速速走 #光頭淫蟲搞?模」的留言。不過安采妮否認與朱Sir撻着，僅稱是好朋友關係，現在已搬離村屋，還稱現時單身。

而與陳達仁決裂的安采妮，幕前工作即時叫停，現在靠送外賣維生，而佢社交網上傳的照片中出現男人手，她稱是用來刺激陳達仁：「陳達仁曾經喺訊息講過，如果我證明到有拍拖，佢就會放手，我公開畀佢覺得我有拍拖嘅相，等佢睇到啲相就死咗條心，唔好再騷擾我。」

安采妮接受東網訪問，對於被指介入朱學文和太太婚姻的傳聞，她發誓：「我冇介入人哋婚姻，我依家係單身，喺社交網同男仔一齊嗰啲相，係攞嚟激前經理人。因為前經理人曾經講過，如果我有男朋友就放開我，我希望佢真心放過我，我同朱Sir只係工作上嘅夥伴，呢啲傳聞好影響我工作同將來拍拖。」

問到朱學文可知被爆緋聞？她說：「朱Sir有同我講唔好意思，我身邊好多朋友都知，好多人打嚟問我發生乜事。（覺得好冤枉？）我了解朱太心情，我覺得係有人煽動佢咁做，達到嗰個人損害我嘅目啲囉。」

她又表示因為其送外賣的搵食電單車被劃花及破壞，現時不能開工，又要自掏荷包7,000元修理，由於她不想將來車保費會加大，所以暫不考慮claim保險，但已報警向警方備案其電單車被破壞。問朱學文可主動要求作金錢上援助？她說：「朱Sir問我有乜可以幫手，我話佢幫我照顧住啲狗就得啦，錢方面我唔使人幫，因為仲有少少儲蓄。」問可會聯絡朱太跟對方解釋？她說：「上次佢情緒好激動，掟晒朱Sir啲衫出街又趕我走時，我都想同佢解釋，我都係等朱太太平靜番先，先同朱太再傾啦。」

其前經理人受訪時指有人借領養，教狗或打機之類對采妮有企圖，更認為她一切舉動及思想行為均由朱學文策劃及安排，又聲稱朱太太已承認老公和采妮的「關係」，采妮就話：「希望朱太唔好被人煽動囉，前經理人夠公開話會放過我啦，佢講咗幾千次，但有邊次係真，其實我離開兩個月嚟，佢仲係不斷騷擾我，除咗send　WhatsApp外，早前我撞車入醫院，佢仲出現拍我膊頭問我有冇事，我驚到呆咗，佢搞咁多嘢，都係想我返去身邊，但我會講一定唔會啦。」采妮還提供多個前經理人用電話「太空卡」傳WhatsApp給她的截圖，內容表示知采妮的行蹤。