望年內結婚！文凱玲咩都未搞：可能就咁簽字註冊

藝人文凱玲為ViuTV新劇《暖男爸爸》拍攝，談到婚期時，她透露拍完之後就會開始籌備，但笑言心知時間好倉促：「得番幾個月，希望今年內搞點，但咩都未定。（一定會擺酒？）屋企人想擺，簡單啲囉，但我哋兩個都好懶冇乜點理到，最後真係可能就咁簽咗字、註咗冊先，到時再補擺酒。」

問到可會擔心婚禮受疫情影響？她表示：「香港比其他地方情況好，街上都開始見到人冇戴口罩，都有啲危險，希望唔好有第二波。（有諗定去邊度Honey Moon？）呢樣又真係冇諗過，咁我哋每年都會去旅行嘅，本身年頭去日本，最後都取消咗。」