粉絲爭人錢　譚偉權「中槍」被叫還錢

演員譚偉權（Gary）剛剛為無綫拍完劇集《一笑渡凡間》，之後會再拍新劇，日前Gary的社交平台見到有人留言叫他的一個粉絲「還錢」，之後更演變成叫他還錢，Gary回覆東網說：「上星期六突然有人喺我個社交平台嘅粉絲留言度話叫還錢。」他指知道被追債的粉絲是誰，但沒有來往及不相熟：「喺我啲活動或演出場合，嗰個粉絲會出現嘅，但無啦啦喺我個平台度追人錢，我都唔明。」

對方之後還私訊他，希望他給該粉絲傳話還錢，他說：「我冇理佢，仲block咗佢，可能佢見我冇反應，佢再喺我個平台啲留言度繼續追嗰個粉絲還錢，最令我激氣，佢之後直頭寫『還錢呀Gary gor gor』、『TVB叫Gary還錢』，佢咁樣寫好離譜，會令人誤以為我爭人錢，完全係誣衊我，我又唔識你，本身件事又唔關我事，點解要咁寫，我覺得係過分好唔啱，係誣衊、誹謗我，我會搵律師朋友諮詢，唔排除進一步採取法律行動。」他希望個粉絲冇乜事，可以早點解決問題。