新片票房報捷 陳家樂湯怡搞小型慶功宴

2020年06月30日 21:00
東網電視
更多新聞短片
真係要賀一賀佢呀!
由袁劍偉執導、藝人陳家樂與湯怡等主演的英皇電影《死因無可疑》自端午節開畫後反應極佳,連續4日力壓同期所有中外電影,榮登單日票房冠軍,累積收入已破三百萬大關,成為戲院重開後,口碑與票房最強的香港電影。為慶祝票房報捷,袁劍偉導演特別自掏腰包,宴請謝票團隊及一眾演員,並順道作小型慶功,除了戲中主角陳家樂、湯怡、馮素波等,英皇集團主席楊受成也有到場為團隊打氣,望成績更上一層樓。
對於票房成績理想,袁劍偉表示衷心感激:「呢套係商業港產片,相比其他香港電影投資更大,主要靠觀眾支持,才有望收支平衡。」有戲迷意猶未盡,紛紛建議開拍續集,導演笑道:「對我嚟講,拍前傳嘅構思非常吸引,我聽到好多觀眾嘅聲音,我諗都係時候落筆去寫故事大綱!」
新作在疫情陰影籠罩下突圍而出,家樂有感而發:「上次入戲院謝票(《我的筍盤男友》)正值疫情開始,大家心情好緊張,全民戒備,今次重返戲院,好開心見到更多觀眾入場,希望疫情繼續好轉!」戲中家樂與湯怡合演情侶,末段家樂將被綁於椅子的湯怡推向兇手,惹起網民熱烈談論,作為男朋友不顧女友死活似乎太自私,家樂替角色辯護:「我不是要推佢去死,只不過想借力去反擊兇手!但冇諗過佢會不滿,仲話要同我分手!」湯怡直言:「肯定會嬲,我會諗,呢個係咪唯一嘅解決辦法。」問到現實生活中,家樂會否跟戲中的角色一樣,親手將女友推向兇手?他說:「角色會啫,我梗係唔會!」
期間導演還大爆如果票房破千萬大關,家樂願意着泳衣,袁劍偉笑言:「記住係泳衣,唔係泳褲,好多謝佢!」家樂即時呼冤:「我冇講過喎,淨係話會萬歲!而且通常女仔着泳衣先啱!」湯怡推波助瀾說:「我有身材就話啫!家樂你好似有六舊腹肌喎!」
另外,對於政府宣布由7月3日開始,戲院入座率放寬至8成,袁劍偉導演大表歡迎:「更多觀眾可以入場,對電影業嘅興旺好有大幫助!」家樂亦大讚是好事:「疫情對電影業有一定影響,希望可以盡快復甦,振興整個行業!」