符曉薇紋囡囡個名上身　陳柏宇待疫情消失生多個

歌手陳柏宇（Jason）與太太符曉薇出席由倪晨曦投資的瑜伽學校開幕禮，席間兩人示範雙人瑜伽「情侶平板式」。兩公婆受訪時繼續鬥嘴，符曉薇大爆老公肥咗好多，因為少運動又狂食雪糕：「佢仲有肚腩，有時我睇番以前未生囡囡啲相，佢真係好靚仔！不過依家愈來愈似爸爸，都幾得意。」但Jason解釋自己的肌肉與脂肪比例良好，會繼續Keep Fat。

問二人會否再追多個？Jason直言老婆最恨生，符曉薇即說：「要等疫情完咗先算，原本想35歲前生多個，但過多幾個月就35歲生日喇！」

而Jason將於本月20日迎來37歲生日，符曉薇說：「嗰日我叫佢陪我紋身，我想紋阿女個名喺手臂上。」問符曉薇會否紋老公的名字？陳柏宇醋意大發：「我邊有資格成為佢身上一個紋身呀！」當問到Jason會否效法老婆紋囡囡的名字在身上？符曉薇反擊：「我哋兩母女邊有咁幸運呀！」