曾志偉內地平台直播賣酒　網民投訴貨不對辦要求退貨

唔少內地藝人於網上平台直播賣貨，香港藝人曾志偉早前亦有份開直播賣酒，當中成績非常理想，銷售額約1,440萬人民幣（約1,592萬港元）。不過近日有網民投訴貨不對辦，指酒竟然冇包裝，亦有網民指買3支五糧液卻只送來1支，另外2支係其他酒，網民疑受騙並要求退貨。

直播長達4.5小時，累計觀看人數超過1,000萬，曾志偉事前亦拍咗多段宣傳短片，親力親為相當落力。未知係咪第一次做直播較緊張，向來口才了得嘅佢竟擺烏龍，將原本購買一款內地名酒可獲贈一支300多元嘅紅酒，講錯成「買一送二」，為補鑊佢豪氣表示會自己補貼出來：「為了賀我第一次做直播，送給大家我是心甘命抵的。」最後佢又加碼送多另一款酒，最後總共送出12,800支，非常闊綽。東網就貨不對辦一事聯絡志偉，但未有回覆。

除咗銷售額成亮點，與曾志偉直播嘅女主持司雯嘉亦成網民焦點，曾獲瑞麗封面女孩華東賽區亞軍，2014年開始在東方衛視主持《娛樂星天地》節目，現於上海廣播電視台東方衛視中心擔任主持人。