幫朱凌凌搵對象！袁文傑推薦候選港姐拍《愛回家》

藝人袁文傑、「朱凌凌」吳偉豪及「Terry」李偉健，現身將軍澳電視城為《愛．回家之開心速遞》拍攝，講到疫情漸趨嚴峻，吳偉豪表示每開一次門都會即時消毒，而袁文傑就話會更注意個人衞生，一日未埋位口罩都不離面，又笑言講對白都會細聲啲：「平時我好大聲，依家要用陰力講，唔想飛沫周圍飛。（有冇話需要停拍避『炎』？）冇呀，因為都要趕出街，都避免唔到開外景，會小心啲。」

講到馮盈盈早前客串演出，吳偉豪興奮話有幸同「女神」對戲，不過壓力甚大：「一嚟佢好靚、二嚟佢又叻，香港小姐冠軍！」恨得身旁的袁文傑、李偉健大叫羨慕，問到之後想跟哪位女藝員合作？三人即互相「射波」，場面爆笑！李偉健笑話：「依家冇盈盈、有『凌凌』，係靚女都想合作！」袁文傑抵死話可幫吳偉豪物色「對象」：「留意到新一批香港小姐進行得如火如荼，知佢鍾意新鮮感，哈哈！」而吳偉豪接話：「我有朋友嗰朋友都有參選，但唔知叫咩名，不過《愛．回家》咁多靚女都未合作晒。」