【終於有中文名】特登裝修間屋!楊怡羅仲謙為囡囡搞百日宴

2020年07月25日 17:27
東網電視
更多新聞短片
簡簡單單都可以好溫馨~
藝人楊怡今年4月為老公羅仲謙誕下囡囡小珍珠,原本二人因疫情打算取消女兒百日宴,但最終決定留在家中慶祝,簡單而溫馨。
楊怡喺社交網晒出囡囡百日宴相片,相中見一家三口着上白色家庭裝,小珍珠眼仔睩睩望鏡頭,非常可愛。屋內除咗擺滿粉紅色氣球,仲專誠訂製一個精美嘅兩層蛋糕,更以海洋為題配合「小珍珠」,十分有心思。
楊怡更公開囡囡中文名為羅翊心,而英文名則叫Hera。佢表示:「親愛小珍珠,不經不覺,你已經滿三個月,不經不覺,你已在悄悄地成長了。時間雖然過得快,但爸爸和媽媽每天都在努力加深認識和了解你,願你在我們的愛護下更加健康地茁壯成長❤雖然在家慶祝,還是想給寶貝留下美美的回憶」
而羅仲謙就話:「小珍珠BB,好多人都話女兒係爸爸上一輩嘅情人,如果係真的話,爸爸等妳等了36年了!爸爸媽媽只係希望妳開開心心、快快樂樂咁成長,開拓屬於妳自己嘅人生,我們永遠愛你❤️」
羅仲謙接受東網訪問時表示,囡囡中文名意思係「立地而飛」,他又說:「我哋係早幾日慶祝嘅。其實BB出咗世後我哋就將客房輕微裝修,重新貼牆紙及購置傢俬,變成一個安樂窩,依家會擇日入伙,BB暫時都仲跟我哋瞓。嗰日我哋就幫佢扮靚靚,喺BB房合照留念,因為唔想佢成長後乜嘢紀念都冇,有所遺憾。」
當了3個月父母,謙謙仍有感自己「新手上路」,多次強調要感謝太太:「我諗阿怡真係辛苦過以往拍劇嘅,佢餵緊人奶,有時會用奶粉取替,BB扭計唔肯食最感到吃力係佢,真係好考耐性。我哋仲成日自己驗BB嘅便便,因為想知道佢成長健唔健康,有時便便黐落手都唔覺得係問題。」為減低太太湊B的負擔,謙謙說:「做爸爸嘅最緊要夠醒,不時要對太太講鼓勵說話,見到餵奶就要幫手準備消毒濕紙巾、咕𠱸等。」
而「全職媽媽」阿怡則表示﹕「湊B難度高過以前捱夜拍劇,但好開心見到囡囡每日都有變化。直至依家我都覺得好似同囡囡唔係好熟咁,要努力認識佢,不過只要成功搞掂佢一餐,我都好有滿足感,小朋友嘅食同瞓對父母嚟講好緊要㗎。」據悉,由懷孕到現在經歷了年多,阿怡的戲癮發作,不排除只要遇到合適劇本及對手的話,自己亦想「復出」,但不會操之過急,短期內仍會以家庭為主。