【學友上身】麥長青結婚21周年冧歌向太太示愛

藝人麥長青（麥包）與太太林孜結婚21周年，一向甚少晒恩愛嘅麥包，罕有咁為太太唱出張學友嘅經典愛情歌曲《你的名字我的姓氏》，仲搵來老友結他伴奏，將佢拍成影片放上社交網向老婆示愛，見麥包唱得勁深情，不時瞇埋雙眼，非常投入，直情好似學友上身一樣。

最近麥包夫婦因為官司纏身，而麥包肉店又捲入被指無牌風波，夫妻一齊經歷咗咁多風雨，臨尾麥包喺片中哽咽講出：「thank you 多謝你廿年來一路喺我身邊，希望唔使再令你擔驚受怕。」向太太大派定心丸。

隨了影片，麥包更留言係飲咗酒先敢唱出呢首歌，佢先係警告網友「有點肉麻，頂唔順不要看」然後說：「我證明飲咗酒真係大膽咗嘅，卡拉OK都不敢唱呢首歌，更何況咁唱法，哈哈！惟有頂硬上！不過這是最經濟和最有誠意的禮物（而且是女兒要求的）。麥師奶，21年了，謝謝你一直在我身邊，無論有多大的風雨，只要有你在旁己（已）足夠，謝謝你一直包容我的缺點和皮（脾）氣，無以為報，只願陪你到白頭！