景甜自爆整容失敗：將自己整成青蛙Pepe

最近唔少藝人由於疫情關係冇工開，都走去做直播節目售賣產品搵吓錢，近年不時被網民話佢整容嘅內地女星景甜，當然都唔例外，佢現身一個直播節目嗰陣，仲講到興起自揭黑歷史，話自己整容失敗。

景甜自爆以前拍戲嗰陣，成日都要黐雙眼皮，搞到引起過敏，所以佢就決定去割雙眼皮，諗住可以一勞永逸，點知將自己整成「悲傷蛙」（青蛙PePe）。佢話第一次做手術嗰陣，由於線冇埋好留低咗一個線頭，要去醫院做第二次手術，結果第二次因線頭又太緊，令到眼皮蹦緊，搞到佢每日都好焦慮，甚至有一段時間都喺度懊悔，仲會忍唔住喊添，相當難過，好在最後佢個雙眼皮都能夠修復成功。

雖然整容失敗，但係佢仲好有霸氣咁話：「這有甚麼呀？誰沒做雙眼皮，講這個沒啥的。」仲溫馨提醒網民想要整容嘅話，一定要考慮清楚，同埋要揀選好嘅醫院同醫生。