東方日報C1:古巨基定28日零確診出關寺廟靜修

2020年08月01日 03:30
東網電視
更多新聞短片
安全至上!古巨基自爆半年冇出街。
已為人父的古巨基為了初生兒子,甘願困在家中超過半年,他以28日的安全期為指標,定下出關之日,屆時即去寺廟靜修,並親攜BB與「四大長老」聚天倫。
古巨基前晚現身「繽FUN Live」,是他升呢人父後首次接受傳媒的獨家直播訪問。面對第三波嚴峻疫情,為顧及初生囝囝Kuson的健康着想,基仔親證由今年2月1日開始,至今未踏出過家門半步!他說:「做咗爸爸媽媽之後,BB嘅安全係我哋最大嘅責任。」早前連續23日「本地零確診」,基仔本以為差不多可以出關,因為曾有醫生教授指如果連續28日都沒有新增個案,相對安全,故他一直以此為指標。
內分泌失調
問到若疫情過後,「出關」第一時間最想做甚麼?他說:「我會去慈山寺,以往我哋定期會去嗰度靜修一下,因為疫情已經好耐冇去,所以出關第一個地方想去呢度。」當然他亦會帶囝囝跟爺爺嫲嫲、公公婆婆見面:「喺閉關前同閉關後都見過一次,雖然日日都會同佢哋視像,但真係好耐冇面對面,所以到時一定會帶BB見吓長輩。」
基仔在直播中自爆老婆Lorraine因為湊B搞到有「媽媽手」,雙手痛到抱不起BB,而他因為負責「通宵更」照顧囝囝,日夜顛倒導致內分泌失調,面部頻頻生「粒粒」,但他倆都不敢出門睇醫生,因為不想帶病毒返家傳染BB!但基仔坦言不覺得是壓力:「Kuson一個笑容已令我哋紓緩。」作為新手父母,他覺得與太太是最佳拍檔,二人輪流餵奶、一齊換片及幫BB沖涼,他笑言有次古太幫BB換片時,忘記用毛巾遮住「何B仔」,結果被囝囝「斟茶」。
他計劃疫情過後,為BB創作一首單曲,記錄愛兒的成長,現時每日都有幫BB拍片:「我想喺BB一歲呢365日,每日記錄住佢發生嘅事。例如佢發夢會喊,我拍低咗好多,古太話佢大個睇番,幾年都睇唔晒,我寧願拍多咗都唔想錯過佢嘅Moment。」他樂意跟大家開心Share,但想等大家心情放鬆才分享這些生活小點滴。
屋企只播兒歌
擁有不少經典金曲的基仔,竟然從未播過自己的歌曲給囝囝聽,只會播放《Johny Johny Yes Papa》、《Baby Shark》等兒歌。早前親教BB講「I Love You」的他笑言:「睇心情,有一輪佢突然多嘢講,有時會望窗諗嘢,呢輪佢特別,會自己不停係咁噏Papa Papa !」節目尾聲,有「遊戲基」之稱的他與主持人大玩遊戲,連玩三個有關他的「估估吓遊戲」,他竟然連番被考起!
更多新聞,請瀏覽東方日報網頁: