同蘇皓兒拍戲有Feel 顧定軒做完運輸兵得個桔

2020年08月01日 08:45
東網電視
更多新聞短片
Zeno小學五年班就做「運輸兵」!
藝人顧定軒(Zeno)首次參演無綫劇集,在《那些我愛過的人》入面飾演朱嘉炳,仲係做蘇皓兒(Chloe)隻「兵」﹗
問現實中有冇試過「當兵」?佢甜絲絲成個怕醜仔咁話曾經試過做「運輸兵」,但最後慘食檸檬︰「好記得嗰陣係小學五年級,每日都會送個女仔返屋企,佢屋企好近學校,一送就送咗兩、三個月,唔知點解同佢好傾得埋,送到去樓下都唔願走,會傾到天黑先返屋企,諗番起都真係唔知有咩可以傾到幾個鐘咁耐,哈哈﹗但當時又唔覺得要同佢表白,淨係個心有種好特別嘅感覺,點知有日佢同我講有心上人,之後就冇再送佢返屋企。」
Zeno自爆一直都以工作為重,就算想拍拖都冇對象︰「想揀圈外人,可以過啲簡單嘅生活,咩都唔使諗,抽離一吓工作圈子,平時個人係一個宅男,可以喺屋企煲足一日劇,想搵到個可以陪自己做無聊、低能嘢。(有結婚計劃?)我會係一個想擁有自己家庭嘅人,視呢個係終極目標,以前仲會諗一定要有小朋友,但依家就會驚啲,因為覺得個責任好大,要自己有信心先可以有小朋友,所以都急唔嚟。」
問會閃婚?自認工作狂嘅Zeno強調現階段都係揀做嘢先︰「把握呢刻有嘅機會,唔想因為錯過一啲機會,而之後會後悔。(屋企人有催婚?)冇,既然佢哋都唔擔心我嘅工作,呢啲更唔使講,有就有、冇就冇,都係我自己恨拍拖。」