【牙煙】符曉薇屋企做Gym踢親個女

歌手陳柏宇太太符曉薇（Leanne）早前喺社交網透露在家做運動有難度，皆因囡囡Abigail會喺佢身邊行嚟行去，搞到佢好壓力，因為好怕會整親佢！但因為疫情仍然嚴峻，令到Leanne冇得去健身室，惟有繼續留喺屋企做，不過令唔少網友睇到一額汗！

首先見Abigail瞓喺瑜伽墊中間，而Leanne不斷來回咁做腿部運動，如果唔小心差錯腳，就會踩到Abigail，之後又見Leanne踢腳，點知Abigail竟然衝去想捉住Leanne隻腳，點知Leanne一踢腳即撞到Abigail，令Abigail仆向Leanne隻腳上，好在接得住冇跌親，Leanne留言：「大家明白點，點解我鍾意係gym room 做運動多啲啦，係屋企做運動簡直增添我難度！」

唔少網友留言大呼好危險，紛紛留言「Abi小心啊！」、「第三個就真係危險！」、「危險，一失手就踩落BB度喇」，亦有網友叫Leanne要好好教導Abigail，喺佢做運動時唔好行嚟行去！