二手平台出錯貨！鄭爽豪氣送14萬蚊頸鏈賠罪

內地女星鄭爽有開網上二手店，除咗將自己的私人物品以貼地價公開發售外，更視網站為溝通平台常跟粉絲互動，都幾有心㗎，不過近日有網友去咗佢度買嘢之後，收貨先發現原來對方出錯貨，咁網友就同鄭爽私訊傾，估唔到傾咗幾句竟然有意外收穫！

網友晒出對話截圖，指鄭爽發現出錯貨已經即時退款，仲送咗好多名牌化妝品、自己簽名相同一條名牌頸鏈。截圖中，見鄭爽確認完對方買咗咩商品後，就主動提出要寄多份同牌子嘅新貨。

網友翻查資料，發現佢送嘅頸鏈官網售價高達13萬元人民幣（逾14萬港元），就連鄭爽自己喺網上賣嘅二手價都收緊2300元人民幣（逾2500港元），可見佢出手十分闊綽！