配偶離開駿洋邨　鄧達智停注射藥後仍發燒發冷

時裝設計師鄧達智確診新冠肺炎，現時在醫院接受治療，而其醫生伴侶陳梓欣（Clement）則入住駿洋邨，今日Clement將可離開駿洋邨，更會回家煲定靚粥，聽日送到醫院畀鄧達智。Clement喺營內拍片，指離營時會收到完成隔離證明，預計半夜會出營，並透露鄧達智比較攰及有少少燒。

鄧達智向東網訪露，指自己身體狀況日漸好轉，昨日更開始停止注射藥物，惟仍有發燒發冷，自己都想早日出院：「因為昨天開始停止注射藥物，冇大藥物反應，但仍有發燒發冷，已經好得多。至於Clement今日可以離開駿洋邨返屋企，之前潛伏期同我哋食過飯嘅夫婦都係今天一起離開駿洋邨。（你更想快啲出院？）係呀，尤其Clement都返屋企，佢今晚回家煲粥，聽朝會攞過嚟畀我。」

而麥德羅女友劉麗萍（Apple）亦收到醫生通知，今日可以離開隔離營：「我好開心，首先多謝一直以嚟照顧我嘅醫務人員，得到佢哋好細心、好悉心照顧，亦多謝網上好多朋友發短訊祝福我，收到成千個祝福，好感恩。我覺得自己好好彩，確診後一直冇乜唔舒服，但亦因為咁，覺得呢個病好恐怖，不知不覺入侵你嘅身體，大家一定要好小心，未出院嘅人亦早日康復，香港早日戰勝呢個病情，加油。」