選港姐10周年！莊思明晒陳庭欣彭慧中舊照　仲有佢？

藝人莊思明於2010年參選香港小姐，勇奪季軍後加入無綫正式入行，不經不覺已經踏入10周年，佢喺社交網晒出一張相信係早前與同屆港姐聚會嘅合照，藉此紀念一番！相中除咗有冠軍陳庭欣及好友「咪神」彭慧中外，仲有未有從事幕前嘅落選佳麗林碧珍！

莊思明留言：「不經不覺原來已經過咗10年啦！10年前嘅今日我哋喺紅館做決賽，所有回憶即刻湧上心頭，諗番起好似只係昨日嘅事。慶幸當年有你哋陪我一齊參選，當中嘅回憶有笑有淚，亦都係因為咁我哋成為咗最好嘅朋友，我一世都唔會忘記我哋嘅印度之旅因為實在太難忘太辛苦但同時亦好開心。」佢又指原本想趁10周年大搞慶祝活動，但因疫情而打消念頭，希望疫情過後可相約再見面。