鍾嘉欣愛上短髮 預告剷青搞到囡囡唔開心

2020年08月02日 21:05
東網電視
更多新聞短片
試過短髮返唔到轉頭!
藝人鍾嘉欣近日由溫哥華回港拍劇,並換上一頭超短髮造型,獲網友大讚耳目一新。呢日佢就開直播大談新髮型:「冇錯,我剪咗短頭髮,我好鍾意,覺得自己好爽朗!阿女Kelly想我有長頭髮,因為佢好鍾意翹,依家短咗冇得翹,佢都有少少唔開心。但我就鍾意短頭髮,因為未試過,覺得好輕、好爽。」佢更預告可能會Keep住留短髮:「原來剪短真係好爽,我依家好鍾意,可能一世都唔會再留長,愈剪愈短,剷青可能都得,未試過唔知。」
佢又透露近日正在家抗疫,並指非常掛住身在溫哥華嘅仔女:「原本佢哋會飛過嚟,但飛唔到啦依家,要等啦,都唔知飛唔飛到,太危險啦。最緊要安全為重,我屋企人都好照顧佢哋,我都放心嘅。」
之後,佢提到自己拍過最愛嘅電視劇,係古裝劇《搜神傳》,隨後獻唱主題曲《發誓》,更唱出多首作品包括《預防針》、《我結婚了》、《做你的晨曦》等,即席開小型演唱會,獲網友大讚回憶返晒嚟!