【娛刺撈飯】楊秀惠5年賺1億 係真唔係呀?

2020年08月03日 14:00
東網電視
更多新聞短片
楊秀惠勁叻女,網購生意搵到盤滿砵滿。
藝人楊秀惠早前拍片分享,成立網店經驗,其中提到經營網店5年,營業額過億元,令唔少人又羨慕又妒忌。
坦白講,秀惠今年5月宣布離開,服務咗16年嘅無綫,喺「告別作」《十八年後的終極告白》入面,佢演一個聾啞人士,又練手語又爆喊,睇得出係好努力,但喺娛樂圈想成功,唔係努力就得㗎,仲要好多其他嘢配合。
正如《大時代》入面股神葉天話齋:「一個人要成功,一定要搵到自己嘅世界,只要喺自己嘅世界入面,先可以將潛質天份發揮。」秀惠就搵到屬於佢嘅世界喇,有人葡萄佢都係人之常情,因為互聯網世代,就係盛產大量haters,同一啲吸金力強嘅KOL。
留意番,秀惠做5年營業額過億,報道話全球收入最高嘅頭5名YouTuber,有兩個係小朋友嚟咋,最搵錢嗰個男仔拍玩具開箱片,都年賺2600萬美元,即係超過兩億港元。
先唔講秀惠做嘅係美容產品生意,坊間嘅形容係「女人錢最易賺」;再講吖,「網購成癮」都唔係咩新奇事,仲有呀,唔好話賣嘅係實實在在嘅產品吖,阿嬌淨係打賞網紅小鮮肉咋,係咁易都四萬銀,都未計本地早前有網紅捐錢,一出手就係十萬,同經理人公司打官司,又爆出每月基本薪金25萬。
That's why早幾年已經有調查指出,近四成本地6至12歲兒童想做KOL,因為上一代發明星夢,呢一代就發KOL夢,兩者嘅共通點係,除非撈極唔起,否則搵錢易、多人Like,名利雙收。
與其質疑網紅吸金力,不如擔心一下,如果愈來愈多人好似秀惠咁轉投網絡,鑽研點樣賺一億,咁邊個去拍劇呢?