【對足30年未厭過】愛妻生日！黃智賢搞大龍鳳勁Sweet

現年52歲嘅黃智賢唔只演得仲好煮得，因為疫情而多咗時間喺屋企嘅佢，日日化身「煮」家男人，為畫家愛妻Maggie下廚，無論中菜、西餐、泰菜等都難唔倒佢，餵到老婆飽一飽！

除咗有「賢淑」一面，原來佢仲相當浪漫！老婆生日，佢用咗好多粉紅色氣球布置屋企，又送上一紮蔬菜花，落足心機炮製驚喜，唔講仲以為佢哋啱啱拍拖呀！兩子之母陳凱琳都睇到心心睇，江嘉敏都留言：「咁sweet㗎?生日快樂丫??」

其實佢哋已經相愛30年，拍拖14年後，喺2004年拉埋天窗，婚後有共識唔生B，視對方為「唯一」，而三隻愛犬就好似仔女咁！黃智賢咁鍾意煮嘢，佢同老婆原來咁啱喺廚房結緣！佢初入娛圈時，因為只有一個兒童節目《閃電傳真機》，收入唔多，所以佢就去餐廳打工，咁就識咗當時係侍應嘅老婆！而兩人未結婚時，黃智賢曾炒股失利，蝕咗20幾萬，但佢仍咬緊牙關堅持繼續供對方去讀書，呢個老公真係絕世好男人呀！