楊秀惠拍片教創業惹爭議　網民抨擊「阻人搵食」

藝人楊秀惠早前拍片自爆經營網店5年內賺一億，並分享生意之道，引起網民熱議。近日佢再上載新一段影片，坦言自從拍片講生意經後，竟收到惡意攻擊嘅訊息，佢表示：「我上一條片同大家講過唔好買Like數同Followers之後，其實我就收到Email同私訊嚟鬧我，佢哋話我唔識就唔好亂講，暗示我唔好阻住佢哋做生意、搵錢，遲啲當我分享邊啲平台好用、唔好用嘅時候，我相信麻煩同爭議會更大，因為會直接影響某啲人嘅收入。」

佢又提到有唔少網友質疑佢已經賺夠，所以教大家做生意「分啲畀人賺」，佢就直言「未賺夠」，並透露自從拍片後，其網店嘅瀏覽量升至一倍，最高更高達五倍，帶挈生意額增加百分之二十至三十，而其頻道及公司網站亦會相輔相成，吸引更多人流，變相節省廣告開支，所以佢不但冇損失之餘，仲可以幫到有意創業嘅人，一舉兩得。