《反黑路人甲》王浩信一「王」七后 位位索爆點樣揀?

20200810
東網電視
更多新聞短片
7個都咁正,可唔可以要晒?
無綫黑色喜劇《反黑路人甲》今晚首播,事前宣傳都非常引人注目,男主角王浩信飾演臥底,大玩一「王」七后,周旋喺7位女藝人之中,名副其實係現代韋小寶,仲要位位都咁索,當中更有唔少激烈場面,如果係你,你會點揀?
先嚟嘅有主角馮盈盈,今次係佢首次擔大旗,飾演警花「Madam Koo」(顧欣頤),以齊蔭馬尾頭示人,睇落非常保守,不過下身就以黑絲上陣,非常誘惑!劇中佢係王浩信下屬,有好多對手戲,仲有場被對方扯開恤衫露Bra嘅戲份,場面香艷!
第二女主角湯怡相隔13年再拍TVB劇,飾演老師蘇芷珊,同王浩信有親密場面,唔只錫錫仲有床戲!雖然要做四眼妹,睇落傻傻更更,但會有佢着制服短裙仔上陣嘅場面,大玩制服惑誘,問你死未?
咪神高海寧(高Ling)飾演明星莊明麗,喺劇中會賣大包勁騷好身材,仲會主動向王浩信埋手,為咗向佢套料不惜投懷送抱、飛擒大咬,向對方送波餅!題外話,佢仲會同石修大玩父女戀,真係無論身材定劇情都好有睇頭!
形象一向乖乖女嘅蔣家旻,一改清純外表做黑幫大家姐姚清水,大搞「黃色行業」!喺劇中賣弄性感去勾引王浩信,當中除咗用美腿誘惑,仲會使出「咬唇功」,場面都好激吓!而呢套劇仲係佢從影以來最性感嘅演出,成功搣甩「馬子妮」影子!
現實中已為人母嘅賴慰玲,飾演社團大小姐蔣千霞,處事冷靜,同佢本身外形都好相似!佢喺社交網就留言:「唔好叫我霞姨,我唔係主管茄喱啡,我主管幾萬個門生!」雖然佢同王浩信冇男女私情,但都有唔少對手戲,因為佢係對方「細妹」,同張振朗嘅感情線都係焦點之一!
扮演社團二小姐蔣千瑜嘅傅嘉莉,分別同王浩信及警司許家傑都有感情線,黑白兩邊走,非常虐心!佢仲喺投資銀行做經理,生意上精明能幹,但愛情上就唔識好好處理!
而最後一個就係做社團三小姐蔣千惠嘅林宣妤,飾演大學生嘅佢非常純情,同冇血緣關係嘅「大哥」王浩信又有感情線!其實佢係「外援」,來自馬來西亞,2017年參選《國際中華小姐》奪得亞軍,之後加入無綫,不過佢今年5月已經離巢返到家鄉發展,而呢套劇唔係佢告別作,《使徒行者3》都會有佢嘅身影!